Det me og veit er at skulekvardagen brått vart annleis for oss alle. No er det dykk foreldre som står med veldig mange oppgåver i kvardagen. I tillegg til å vere foreldre, vert det og dykkar jobb å oppmuntre til og til dels stå for den daglege opplæringa av barnet dykkar. Me veit det er vanskeleg for ein del elevar å gjere dette arbeidet sjølve, men når me ikkje kan vere saman i skulekvardagen, er denne oppgåva på mange måtar dytta over på dykk. Tusen takk for den innsatsen de bidrar med, alle som ein.
Mange lærarar sit jo i same suppa når dei må vere lærarar for eigne barn samstundes som dei skal planlegge opplegg med til dels nye verktøy og vere tilgjengelege for elevane sine behov. Så me sit i same båten og me må hjelpe kvarandre. Nokon vil ikkje mase for mykje på skulen, men det går ikkje an å mase for mykje på skulen. Mas i veg! Lærarane hjelper og kvarandre på tvers av klassar for å finne løysingar i det daglege.
Det er stusseleg å vere på skulen utan elevar. Me veit at mange elevar saknar klassekameratane sine, og nokon å vere med. Det er greitt med ein pause frå skulen, men når pausen vert så lang og på denne måten , er det eigentleg ikkje så greitt likevel. Me saknar og elevane. Ein skule utan trøytte morgonfjes, rop og latter i gangane, kviskring i krokane og springing på skuleplassen er verkeleg stusseleg.
I dagane før påskehelga vil me få ny informasjon om kva som skjer vidare. Informasjonen vil nå dykk like fort som den når skulen via media, men me sender sjølvsagt melding ut til dykk direkte på e-post om kva som skjer vidare.
Skulen er veldig viktig, ja, men endå viktigare er det at de tek vare på kvarandre i denne rare tida.
Ver tolmodige og følg smittevernråda. Me fiksar dette!
Helsing Dorte